21.04.2015 15:06

Kvennatölt Spretts

Fljóð frá Grindavík sem er ræktuð af og í eigu Styrmis Jóhannssonar varð í 4. sæti í A-úrslitum í byrjendaflokk á Kvennatölti Spretts sem var 18. apríl sl. Knapi hennar var Marie-Josefine Naumann og voru þær í 1.sæti inn í A-úrslit og eftir harða úrslitakeppni urðu þær í 4. sæti sem er frábær árangur hjá nýliðum í keppni.

Brimfaxi átti þrjá fulltrúa á mótinu en Stella Ólafsdóttir og Katrín Eyberg kepptu í byrjendaflokk og Valgerður Valmundsdóttir í Minna vanar flokk og allar stóðu sig vel og sýndu góða sýningu.
Á mótinu mátti sjá fleiri ræktunarnöfn frá Grindavík, en Jóhanna Ólafsdóttir keppti á Heklu frá Grindavík í byrjendaflokk en Hekla er ræktuð af Ólafi R. Sigurðssyni. 

Yfir 150 konur kepptu á kvennatölti Spretts sem er metþáttaka og knapar og ræktendur úr Grindavík létu sig ekki vanta.
Meðfylgjandi mynd er af Valgerði á Pöndru frá Álfhólum á kvennatöltinu og við óskum eftir myndum frá mótinu og þær má senda á brimfaxi@gmail.com

20.04.2015 13:26

Skjal frá Sótamönnum

Sótafélagar létu Brimfaxafélaga hafa þakkarskal fyrir móttökurnar sl. laugardag, á skjalinu er vísa sem er eftirfarandi:

Til Grindavíkur er leiðin greið
glöð frá nesinu leggjum á skeið
með reistan makka
við viljum þakka
Brim-faxa félögum þessa reið

Meðfylgjandi myndir eru af skjalinu og Steinunni Guðbjörnsdóttur og Hilmari Larsen sem Munda tók. Brimfaxi vill þakka Sóta fyrir frábæra heimsókn.

17.04.2015 15:16

Hestaferðin í sumar

Síðasti skráningardagur í hestaferðina í sumar er 1. maí nk.
Sjá auglýsingu hér: HESTAFERÐ

15.04.2015 08:31

Reiðtúr með Sótamönnum

Laugardaginn 18. apríl ætla félagsmenn úr hestamannafélaginu Sóta á Álftanesi að koma í heimsókn og fara í reiðtúr með okkur Brimfaxafélögum.
Reiðtúrinn hefst kl. 14:00 og við leggjum af stað frá hesthúsinu að Þórkötlustöðum og förum Hópsneshringinn og endum reiðtúrinn á kaffiveitingum og léttu spjalli.
Allir velkomnir.
Kveðja, formaðurinn.

13.04.2015 15:40

Lokamót vetrarleika Sóta

Sylvía Sól Magnúsdóttir var í 1. sæti á Sigurfara frá Húsavík í 17 ára og yngri flokk á opna þrígangsmóti Sóta sem haldið var 11. apríl sl.
Sylvía varð einnig á sama móti í 5. sæti í hindrunarstökki á Sigurfara frá Húsavík.

Opna þrígangsmót Sóta var þriggja leikja mótaröð og stigakeppni þar sem keppt var í tveimur aldursflokkum í smala, brokk og hindrunarstökki og svo ein- tví- og þrígang þar sem Sylvía Sól sigraði stigakeppnina þar sem hún var stigahæst í sínum aldursflokk.

Til hamingju Sylvía Sól með frábæran árangur.

11.04.2015 12:22

Málverk og fl.

Ljósmyndarinn Nikólína Jónsdóttir hefur tekið myndir á viðburðum hjá Brimfaxa og myndir frá henni má m.a. sjá hér: http://brimfaxi.is/photoalbums/261683/
Hún er einnig með flickr myndasíðu sem má finna hér til vinstri á heimasíðunni en til gamans að þá er Lína líka mikill teiknari og málari og myndir frá henni má sjá í myndaalbúminu undir Nikólína.
Við þökkum Línu fyrir að lofa okkur að setja myndirnar hérna inn.

10.04.2015 08:20

Sótamenn í heimsókn

Laugardaginn 18. apríl ætla félagsmenn úr Sóta á Álftanesi að koma í heimsókn til okkar með hesta sína og við förum saman í reiðtúr.
Nánari auglýsing kemur þegar nær dregur.

06.04.2015 13:20

Kilja í 4 sæti með 8,39

Kilja frá Grindavík var flott á vellinum á þeim allra sterkustu og varð í 4. sæti með 8,39 sem eru engar smá tölur.
Knapi og þjálfari Kilju er Jakob Svavar Sigurðsson og óskum við honum og Hermanni til hamingju með frábæran árangur.

Fyrir áhugasama má sjá úrslitin í myndbandinu hér að neðan sem var tekið af hestafrettir.is og Kilju má sjá á mín. 0:10, 1:03, 2:23, 3:09, 4:06, 5:13, 6:10, 6:38 og 6:54

04.04.2015 13:25

Hesta- og menningardagurinn

Myndir frá Hesta- og menningardegi Brimfaxa eru komnar í myndalbúmið sem Jóhanna Harðardóttir og Sylvía Sól Magnúsdóttir tóku.

Forsíðumyndin er af Ólafi R. Sigurðssyni að leggja af stað í reiðtúrinn og myndina tók Jóhanna Ólafsdóttir.

03.04.2015 13:40

Þeir allra sterkustu

Landsliðsnefnd LH heldur töltmótið þeir allra sterkustu og stóðhestakynningu í Sprettshöllinni á morgun laugardaginn 4. apríl.
Keppnin og kynningin er til styrktar Landsliði Íslands fyrir HM í Danmörku í sumar.
Auglýsingu LH má finna á heimasíðu þeirra LHhestar og einnig hér: Allra sterkustu

Kilja frá Grindavík sem er í eigu og ræktuð af Hermanni í Stakkavík mun taka þátt í keppninni allra sterkustu en Kilja er löngu búin að stimpla sig inn sem ein af bestu tölthrossum landsins en 26 hross munu keppa í þessari sterku keppni.

01.04.2015 09:02

Fréttir á heimasíðuna!

Systurnar Halldóra Rún og Ásdís Hildur Gísladætur láta ekki smá kulda aftra sér að fara á bak og þeim Dropa og Krumma líkar vel við félagskapinn frá þeim.

Nú er vonandi að koma vor og hestamenn eru í óðaönn að temja, þjálfa og fara í útreiðar sér til skemmtunar, einnig eru sýningar af öllu tagi í gangi um land allt og keppnistímabilið byrjað af krafti. Félagsmenn eru hvattir til að senda fréttir af sér og sínum í hestaíþróttinni á heimasíðu netfangið brimfaxi@gmail.com

31.03.2015 16:06

Páska bingóið

Krakkarnir létu sig ekki vanta á páska bingóið og vinningarnir voru páskaegg af ýmsum stærðum og aukavinningarnir fjölbreyttir.
Allir krakkarnir fengu svo páskaegg nr. 1 með málshætti í lok bingósins.
Nefndin vill þakka veitingastofunni Vör, Hafnargötu 9 fyrir aðstöðuna og öllum sem gáfu páskaeggin og aukavinningana.

Gefendur páskaeggja og aukavinninga voru:

Aðalbraut
Arctic horses
Bláa lónið
Bryggjan kaffihús
Edith betra hár
Einhamar ehf
Hraun Grindavík
Veitingahúsið Brúin
Voot Beita

Myndir má sjá í myndaalbúminu.

30.03.2015 21:55

Folaldasýningin

Folaldasýning Brimfaxa var 28. mars sl.
Úrslit urðu eftirfarandi:

Hestfolöld
1. Ormar frá Stafholti
2. Morri frá Syðra-Langholti

Merfolöld
1. Sævík frá Stafholti
2. Fjóla frá Grindavík
3. Skíma frá Syðra-Langholti

Myndir eru komnar í myndaalbúmið.

28.03.2015 22:09

Páskabingó

Páskabingó æskulýðsnefndar Brimfaxa verður mánudaginn 30. mars kl. 17:00 á veitingastofunni Vör á Hafnargötu 9.

Fullt af páskaeggjum og aukavinningum :)

27.03.2015 14:10

Folaldasýningin á morgun 28. mars

Folaldasýning Brimfaxa verður á morgun laugardaginn 28. mars kl. 13:00 í reiðhöllinni hjá Palla og Mundu.
Maggi Lár kemur að dæma og veitt verða verðlaun fyrir 3 efstu merfolöldin og 3 efstu hestfolöldin.
Skráning er hjá Styrmi í síma 824-2413
Styrktaraðili og gefandi verðlauna er Marver ehf.

Aðgangur er ókeypis og allir velkomnir.
Flettingar í dag: 206
Gestir í dag: 34
Flettingar í gær: 231
Gestir í gær: 46
Samtals flettingar: 796317
Samtals gestir: 91794
Tölur uppfærðar: 16.8.2018 08:52:07